View Full Version : Ўзбекистон саёхати
Hudo xohlasa mana yana qaytib keldik FORUM.Uz ga
Bir hafta davom etgan O'zbekiston bo'ylab sayohatimiz ham qiziqarli, ham achinarli ham da sarguzashtlarga boy bo'ldi.
Avval marshrutimizni aytib o'tay keyingi safar har biri haqida bir-ikki og'iz to'xtalarman.
Toshkent - Samarqand - Shahrisabz - Kitob - Denov - Samarqand - G'ijduvon - Vobkent - Romitan - Buxoro - Toshkent - uzoqqa.
mana shu shaharlarda kindik qoni to'kilgan vatandoshlarimdan ham navbati kelganda yordamlarini so'rayman, hafa bo'lmasalar.
yana bir narsani usti yopiq holda aytib o'tay: Sayohat davomida Forumdoshlardan bir kishi ham bizga yo'l sherigi bo'ldilar. men oldinroq harakat qilib thread ochay deb halloslab kelib turibman shu hozir.:P
narslarimni bir joylashtirib olay keyin bafurja gapirib berarman hasratdagilarga....
sabringiz uchun oldindan rahmat
Саёхат давомида кўлимдан келганча кўрганларимни ёзиб боришга гайрат килдим. Ўша дафтарчамдаги чала ёзувларимни сизлар билан бахам кўрмокчиман.
Хаёлларимни исботини излаб
Шундай килиб Тошкент аэропортидан тушган хамон Самаркандга билет олиб самолетга чикиб олдик. Ишонасизми 300 неччиям ў ринлиик Боингда бор-йўги 27 тача йўловчи бор эдик. Уларниям 15 тачаси Олий Мажлисни одамлари эканмией. Тушганда билдик. Биз ўзи 5 киши эдик. Чет элдан мехмонларимиз хам йўк эмасди. Билет нархи 25 доллардан киши боши. Аттанг самолети тушмагур бўм-бўша.
Стюардессалардан саккизтачаси тизилиб у ёкдан бу ёкка юриб алламбалоларни уктириб бўлишлари билан хавсизлик камарларини такканимизча учогимизни осмонга кўтарилишига кўмаклашиб ўтирдик, ичимиздан ўтолиб. (гинг-гинг) Самаркандгача 245 км деган ёзув олдимизга ўрнаштирилган экранларда хариталар устида беш ўн марта кўриниш берди. Учиб кетяпмиз. Иллюминатордан томоша килиб суратга олиш билан овора бўлаётганимизда. “Илтимос хавсизлик камарини такинг” деса бўладими хаво жонони (шеригим стюардессага шунака от кўйиб олувди). Камарни хали ечиб улгурмагандик, бироз кулишиб олдик. 30 минутда бориб кўйибмиз манзилга.
Тушиб аэропорт биноси томон юраётувдик расмийлардан ва милиция ходимларидан бир нечаси кўл ковуштириб хушомад кила бошлашди. Юзига бехосдан краска тўкиб олган ўрис башара бир аёл югуриб келиб Вы парламентская группа? дегандан кейин хамрохларимизни Олийларданлигини билдик.
Самарканд хавоси иликкина эди. Хайхотдай аэропортда 5-6та киши сангиб юрибди. Бошка хеч киим йўк. Аввалига хайрон бўлиб багажларни кутиб ўтирдик. Кейин шахар марказидан битта микроавтобус киралаб шахрга равона бўлгач сал пал одам исини олиб енгиллашдик. Максад тарихий ерларни зиёрат эди.
Манна шу жойда бир нарсани эътироф килишим керакки, мен бугунгача Ўзбекистонни ичларига асло сафар кимагандим. Факат хаёлимда жонлантирардим. Ушьу саёхат мана шу хаёлларимдан баъзиларини кучга, яна баъзиларини пучга чикарди. Ахир хаёлларимни исботини излаб чиккандим да сафарга.
Самарканд ман ўйлаганчалик катта эмасди. Шахарни бир чойхонасида нонушта килиб олгач Карши томонга караб йўлга тушдик. Каршида бизни рўйхатимизга тушган бир иккита макбара бўлиши керагиди. Йўл йўлакай излагнимизни Китобда топажагимизни хабар олиб, от бошини ўша тарафга бурдик. Шоферларимиз тожик бачалар эди. Ўзбекча акцентларига махлиё бўлиб Кашкадарё вил. га кириб келганимизни хам сезмай колибман. Чегардан ўтаётгандай килиб 25 тача мелисани орасидан ўтиб Кашкадарё худудига кириб келдик. Осмон кўмкўк. Ер тап-такир. Ахён ахёнда кеккайиб турган дарахтдан бошка хеч вако йўк. Бироз юргач, бир-икита кишлокдан ўтдик. Иккинчисида бир мол бозори бор эканки йўл ёкасида. Гавжум орасидан 500 метрни 15-20 минутда босиб ўтдигов чамамда. 3чи кишлок К. Содиков ж/хўжалиги деб аталаркан. Уйлар жуда эски, кора лой шувок килинган холос. 15-20 йил илгариги хозирги Козогистоннинг Туркистони атрофидаги кишлокларни хотирлатди менга. (Ўша жойларда 10-15 йилимизни ўтказувдик бир пайтлар)
Кишлокка киргач дарахт кўрина бошлади хар жой хар жойда. Мен ям-яшил бог-рог деб тасаввур килардим. Унакамас экан. Бугдой ва пахтазорлардан бўшаган далалар ястаниб ётибди. Кишлокларда уйлар урушдан кейин хар жойда колиб кетган танкларни эслатар. Ховли деган тушунчадан кўпчилиги бенасибди. Атрофии девор билан ўралган ховлилвр хам саноклигина экан. Кейин икки тарафи тутзор бўлган кишлокка кириб кела бошладик. Бунда уйлар нисбатан яхширок. Бог-роглар кўрина бошлади. Газ билан таъминлнган, адашмасам Бекистон деб аталарди. Ахолиям нисбатан зич. Пахтакор ж/хўжалиги деган жойдан ўтиб Чирокчига киргач ичимизга чирок ёнгандай бўлди. Куз бўлишига карамай хамма ёк ям-яшил, чиройли, кўнгил кувнатадигандай эди аввалгиларидан кейин. Кун иссик бўлсаям одамлар чопон-кулокчин кийиб олишгани ажаблантирди. Кўчада болалар, аёллар, чоллар. Хаммасини юзида самимийлик билан бир каторда кандайдир бир хоргинлик сезиларди. Йигитлар, азаматлар кўринмасди. Балки мана шу бола –чакани ризкини деб олис ўлкаларда юргандир.
Автобусимиз зингиллаб борар. Йўлда илгаб улгурган нарсаларимиз ахоли пунктлари хакида визиткага айланиб блокнотимга тушарди. Шунинг учун хам тассуротларимизни алдамчилик эхтимоли баланд эди.
Коратепа. Яккабог тумани деган ёзувларни укиб улгурдим. Манзара тундлашди. Йўл чеккасида савлат тўкиб турган Иктисодиёт коллежи билан бошка иморатлар орасидаги фарк осмон билан ерча келарди. Амир Темур номли ахоли пунктига оборадиган йўлга чикканимизда атроф яна гўзаллашди. Каршимизда Тог манзараси чиройли эди. Олдимиздаги айланма йўлдан чапга бурилдик. Бир томони ям-яшил бог ва далалар, иккинчи томони га уйлар тизилган йўлдан бормокдамиз. Чиройли ва ихчам килиб курилган теплицалардан ўтгач Ўзбекистон ж/хга кириб бордик. Йўл четидаги уйларни яна мазаси кочди. Лекин боглар, далалар хаммасидан чиройли эди.
7 км ча юргач Шахрисабз дарвозасига етиб келдик.
(давоми бор келаси пост: Шахрисабз- яшил шахар!)
Asadbek
12-01-2005, 02:58 AM
... Пахтакор ж/хўжалиги деган жойдан ўтиб Чирокчига киргач ичимизга чирок ёнгандай бўлди.
...
Shundoq bizni uyni yonidan o'tibsiz-a...
Eee rahmate, bir uyga borgandek bo'ldim :)
Shundoq bizni uyni yonidan o'tibsiz-a...
Eee rahmate, bir uyga borgandek bo'ldim :)
avvalroq bilsaydim kirib choy poy qilib chiqib ketardim. :D
Gareeb
12-01-2005, 08:04 AM
Hikoya qilish san'atizga balli.:)
Davomi qachon bo'ladi?
Шахрисабз - яшил шахар!
Шахрисабзга кириб бормокдамиз. Кандай чиройли, кандай илик истарали шахар! Такир, бўм-бўш далалар эсдан чикиб кетди. Ноябрь ойи бўлишига карамай, об-хавоси иссиккина экан. Оти хам айтиб тургандай Шахри сабз – бу ям-яшил шахар!
Жуда хам ёкди менга. Ичимда кандайдир бир кувонч балкиди. бир пайтлардаги Ялланинг кўшиги эшитилгандай бўлди: Шахрисабз, Шахрисабз. Тебе пою я песню эту….
Шахарни асосий кўчаларидан бирида кетмокдамиз. Бироз илгарилаб ўнг тарафга хийла бурилгач, улкан макбара дарахтларни тепасидан кўриниш берди. Лекин унга бориш осон кечмади. Шундоккина 200 метр якинида турсак хам, транспорт билан ўтишни иложини тополмай ўнгга бурилиб 2-3 кмча айланиб колдик. Эски шахар кўчаларига кириб колиб озгина асаблар таранглашди тўгриси. Эрталабдан бери туя минган апандидай бўп когандик. Лўк лўк этиб 70-80 км тезлик (бунга тезлик дейиладими ўзи?) билан аранг етдигов. Шофери тушмагур жаа йўл харакати коидаларига ихлоси баланд бача экан.
Хуллас эски шахар кўчаларида дайдиб юриб тўрт-беш одамдан ёрдам сўрадик. Барака топсинлар жуда яхши тушунтиришди. Лекин “аввал ўнга, кейин чапга, озгина юриб ўнга, кейин Яна ўнга ана ундан кейин чапга” деб таъриф килингандан кейин одам ўнг билан чапни фаркига хам бормай коларкан. Ишкилиб охирида топиб бордик худога шукр.
Темир панжаралар билан кўршалган дарвозаси олдида тўхтаб, кўзимизни катта катта очиб ичкарига равона бўлдик. Бита ховлида Хазрати Имом масжиди ва Жахонгир макбараси жойлашган экан. Олдин макбарага кириб биттадан фотиха ўкиб чикдик. Ўша пайтда жамоат масжиддан чикиб кела бошлади. Улар билан хам оёк усти жичча сухбат килдик. Керакли манзилларни сўраб суриштириб аниклаб олдик. Аксарият катта ёшдагилар, кариялар эди. Лекин юзлари нурли, гаплари мулойим мўминларди. Тахоратларни янгилаб тарихий жоме масжидда хушу билан пешин ва асрни жам килиб адо этдик. Кандай тотли туйгуларди. Хушу билан ибодат килиш маконга хам боглик экан. Рахмат сизга шахрисабзликлар, рахмат сизга ушбу масжидга таважжух этган аждод! Намозда мана шу ўйлар калбимдан кайнаб кайнаб чикаверди.
Масжид имоми, ховлисида китоб сотувчи киши хамма хаммаси худди эски кадрдонлардай эди. Китоб сотувчиси темурий обидаларидан кўпчилигини таъмирдан чикарган куллари гул уста эканлар. Амир Темур бобомизни киндик конлари тўкилган юртни инсонларига диккат билан разм солдим. Худди отларини хозиргина шу деворни оркасига боглаб келган темурий лашкарларига ўхшарди. Ёки менга шундай туюлдими билмадим, хуллас хмм….. бошка гап тополмаяпман. Кискаси менга ёкди.
Вактимиз зик бўлганидан менинг кайфим бузилиб оркамга караб караб масжидни олдинги ёгоч дарвозасидан чикиб истамайгина микроавтобусимизга миндим. Йўлни нариги тарафида савлат тўкиб турган шайх Шамсиддин Кулол макбарасини хам узокдан фотиха ва ихлослар билан зиёрат килиб йўлимизни давом эттирдик.
Эндиги манзил Китоб!
Китоб
Китоб шахрига кираверишда чоррахами ёки уч йўлни кесишган жойимиди, ишкилиб ўша жойдан озгина ўтиб, ўнг кўлда масжид дарвозаси ёнига тўхтадик. Кун тушдан оккани учун, кош корайгунча Деновга етиб олайлик деган гам билан шу ердан бита йўл рахбари ёллашни маслахатлашиб олдик. Бормокчи бўлган манзилимиз Дарвеш Мухаммад ва Хожа Мухаммад Имканагий хазратларининг кабрлари эди. Халиги масжид ховлисида бир мадраса хам бор экан. Оти эсимдан чикди. Суриштиришимиз натижасида хар иккала кабрнинг хам Китобга карашли чека кишлокларда эканлиги маълум бўлди. Шунинг учун хам шахарни кезиб кўришдан воз кечдик афсуски. Ўзимизга колса яна излаб вакт йўкотишимизни айтиб биродарлардан кўмак сўрадик. Аъзамхон деган зот мухтарам рози бўлди барака топсин.
Шу ерда диккатимни тортган бир нарсани хам зикр этиб ўтай:
Шоферларимиз Шахрисабзда “Шариф-маъриф” фильмидагидака акцентлари билан бўлса-да ўзбекча гапиришга урингандилар. Аммо бу ерга келиб негадир дуч келган билан бемалол тожикча гаплашиб кетаверишди. Хайратимдан уларни сухбатдошидан хозир “тушунмадим” деган жавоб келади деб кутишим бекор кетди. Улар хам “каши-маши”-деб сайраб кетишди. Ўшанда бу диёрда “бегона ва сайёх”лигим ёдимга тушиб йўлга давом этдим.
Китобдан чикиб бир канча кишлоклардан ўтдик. Мен аввал илгаб, кейин ёзиб улгурган тартибга кўра манна бундай: Хайробод, Навоий ж/х-ги, Сариосиё (адашмасам) к-ги, Гулбог к-ги, Севоз к-ги ва нихоят Имкана кишлоги. Сўнггиси халк орасида Хўжа илм кони деб аталаркан. Бир тепаликни этагида жойлашган экан, ўша тепаликка караб автобусимиз тирмашиб кетаверди. Эски, ярим вайронадек (тарихий десаям бўлар балки) кўринадиган уйлар жойлашган тор кўчаларни айланиб юриб Хожа Мухаммад Имканагий хазратларини зиёратгохига етиб келдик.
Мана шу жойда биз зиёрат учун чиккан улуглар хакида икки огиз: Бу улуглар йўлига мансубларига Силсилаи Олияи Накшибандия дейилади. Яъни накшбандийликнинг олий силсилсиласи. Ёки Силсилатуз-захаб (олтин силсила) деб хам ўтади китобларда. Пайгамбаримиздан олинган омонат, калб илмлари мутахассиси бўлган юзларча тасаввуф йўллари оркали оламга ёйилган. Мана шулардан энг етук, энг комил ва суннати санияга энг чамбарчас боглик бўлган силсила – улуглар йўли мана шу накшибандийлик бўлади. Бу йўлни буюклари асри саодат камтаринлиги ва тавозесида хассос бўлганлар.
Илк зиёрат килишимиз насиб бўлиб турган Хожа Имканагий хазратларининг кабрлари атрофи тахминан 2м баландликда, 5х10 мармар/тош девор билан ўралиб ичи девор бўйича тупрок тўла экан. Тепаси очик, яъни мутавозий бўлган хаётларини яна камтаргина кабрлари идома эттирибди. Шундай хузур, шундай файз борки, таърифи имконсиз. Худди хам жисмонан, хам рухан дам олгандай бўлдик. Бу йўлни мансуби буюкларни кабрларини бошида ўша валийнинг туги хам кадалиб тураркан. Лекин кабрни устига темирдан бостирма-сифат килиб кўтариб кўйилган нарса асло ярашмабди. Буям хозирги замон архитектура тарзи бўлса керак. Тепаси хали ёпилмагани учун, худди катта бир махлук асрлар бурун келиб ўлиб колгану кўкрак кафаси кабрни устига тўгри келиб колгандай. Атрофда ташландик бўлиб ётган мозорлар хам манзарани бунчалик бузиб тургани йўк тўгриси. Бизга Хожа Имканагий хз.ларини невараларидан эканлигини айтган йўл рахбаримиз Аъзамхон маромини тожикча тушунтиришга бел боглагани учун ортикча маълумот олишдан махрум колдик.
Эндиги манзил биз Дарвеш Мухаммад хз.лари деб излаб юрган, халк орасида Хожа Асфароз деб машхур бўлган зиёратгох кайдасан деб Оксув кишлогига равона бўлдик. У ерда кабрни топиш унчалик кийин бўлмади.
“…. Дарвеш Мухаммад хазратлари х.970 (м.1562) йили Мовароуннахрда Бустар нохиясининг Дасфарор кишлогида вафот этган. Силсилаи Олиянинг йигирма еттинчи фарди комилидур.”- дейилган китобларда. Хозир бу жойларни номлари ўзгариб Оксув кишлоги, Асфароз деб юритиларкан.
Дарвозасига йўл бўйлаб окадиган каттарок арикни устига курилган кўприкдан ўтиладиган кабристон олдида тўхтадик
(давоми бор)
давоми:
“…. Дарвеш Мухаммад хазратлари х.970 (м.1562) йили Мовароуннахрда Бустар нохиясининг Дасфарор кишлогида вафот этган. Силсилаи Олиянинг йигирма еттинчи фарди комилидур.”- дейилган китобларда. Хозир бу жойларни номлари ўзгариб Оксув кишлоги, Асфароз деб юритиларкан.
Дарвозасига йўл бўйлаб окадиган каттарок арикни устига курилган кўприкдан ўтиладиган кабристон олдида тўхтадик
Дарвеш Мухаммад хазратларининг кабрлари бош тарафида илгари айтиб ўтганимдек бир туг турибди. Бу кабр кўрсизгина эди моддий томонидан олиб караганда. Чор атрофи тепа тепа мозорлар. Кабр ахли кўзимиздан пардалангани ва биз бечораларнинг калб кўзимиз кўрлиги боис басиратимизни манна шундай моддий томонинигина кўриш билан чеклаб кўяверади аттанг.
- Ассалому алайкум ё ахлал кубур! Бу саломга канча аликлар олинганини хам афсуски эшитмаймиз. Афсус дедим, балки эшитсак бир умр ўзимизга хам келолмасмиз. Зиёрат давомида шунга ўхшаш ўйлар калбимни банд килиб кайси сурани неча бор ўкиганимни хам эслолмай колдим. Энди ўзимни, диккатимни жамлашга тиришаётганимда бехос хамрохлардан бирининг кўзига кўзим тушиб кетиб Яна хаёлга чўмиб кетибман. Ихлоси баланд эди аввалдан. Кўзларида мунчок мунчок ёш, лаблари пичирларди....
Киёмат куни хар мамлакатни мўминларини оркаларидан эргаштириб махшарга олиб борадиган ва дини Ислом йўлида оила, авлод, бог-роглари-юватанларидан кечиб дунёнинг турли чеккаларига таркаб кетган Сахобалар хам ўша кабрни тепасида турган тугга ўхшаш бир байрок кўтариб олишаркан кўлларига. Балки бу зотлар хам мана шу юртни мўминларини Улуг майдонга эргаштириб олиб боришар.
- Ё рабби! Мана шу зотларни дуоларига ижобат килганингдай бизни дуоларимизни хам ижобат килгин. Ватанимизга тинчлик, омонлик, осойишталик ва икки дунё саодатини насиб этгин! Омин. Мана шундай ниёзлар орасида хаёлимга учкундай бир кабр душмани танишим келиб колса бўладими? Олим тан олмайдиган ўша “диндор” ўлганни хурматини хам ўрнига кўймас, одам ўлиги билан ит ўлиги бир дерди. Кабр зиёратига жон-жахди билан карши бўлган ўша харифнинг ёнингизда тургандаги башараси канчалик дилингизни бехузур килса, хотираси хам шунчалик кайфиятни бузаркан. Хозир мени шу холатда кўрса борми, шайтонлаб коларди мушрикдан олиб мушрикка солиб. Яна Куръондан оламан гапларимни деганига ўлайми?
Яхшигина бошланган зиёратим шунака ўйлар билан кўнгилни хижл киладиган бир кайфиятда тугади. Чарчок хам таъсир килгандир воситага миниб кечинмаларимини ён дафтарчамга чала калам кўчириб олдим.
У ердан чикиб йўл рахбаримизни олган жойимизга элтиб, совга-саломлар улашиб “кўлингни бер Денов” деганча чўлу биёбон сари 70 км тезликда “учириб” кетдик. Йўл-йўлакай дарахтсиз, негадир афгон овулларини эслатадиган кишлоклардан ўтиб тог-тош, дала-дашт карига сингиб кета бошладик. Бундан буёги уйку аралаш бўп кетди. Ха айтгандай йўлда келаётиб окшом пайти, чап (балким ўнгдир) томонда улкан бир чойхонага тўхтаб кечкурунги таомимизни тановул килиб олдик. Икки каватли эди чамамда. Одам гавжум эди. Уйкудан энди уйгонганим учунми, гангиб каерда, номи кандай, каерга карашли макон деган ўй хаёлимга хам келмабди. Эсимда колгани, йўлга караб турган чойхона биносининг чап томонидан оркасига ховлисидаги бир талай эшиклари бўлган чўзилиб кетган бинонинг учинчи ё тўртинчи эшигига кирганимиз.
Бир махал Сурхондарё Вилояти дарвозасига келиб тўхтаганимизда яна мудраб кетганимни сездим. Кўзларимни ишкалаб улгурмай чегара постидаги (давлат ичида чегара сўзини ишлатиш нокулай бўларкан. Хатто давлат деган сўзниям бундан кейин эхтиёткорлик билан кўллансам керак.) битта милиция ходими келиб честь бериб туриб “Ассалому алайкум хурматли мехмонлар. Хафа бўлмайсизлар хизматимиз шунака” - деб паспорт сўрагани уйкумни батамом кочириб юборди.
Ха бўларкан ку! Одамдай муомала килиш бинойидай ярашарканку бизларникига хам!. Биз Тошкентнинг “лўлибозордан” импорт килинган ментларини тўнг характерини кўравериб ёмон кўриб колгандик да.
Ўзимда йўк кувонганимдан бутун паспортларин ўзим йигиштириб бердим. Тушиб хол-ахвол хам сўрашиб кўйдим эски кадрдонлардай. Мана шундай бўлса-ку барчаси кандай гуллик-гулистонлик бўларди ватан. Лекин каёкда, буларни сафидагиларни кўпчилиги, айникса шимол тарафдагилари (бизам шама килишни ўзлаштирдик бошчилардан) худди оламнинг 1 номерли террористи билан юзма-юз тургандай гаплашишади.
Эй яша Сурхондарё! Хар канча тупрогинг такир, ўзинг факир бўлсанг хам, бир милиция ходимингга мана шунака илик гапларни айтказишингни ўзи сени севишга арзийди. Ўпдим сени Сурхондарё!
Чет эл чегарасидан ўтгандай килиб ўтилидиган вилоят постидан бу сафар мамнуният билан ўтдик. Шунака ходимлар турадиган бўлса, хар кишлокни бошига пост кўйсангларам ман рози...
Кош корайганда Деновга кириб бордик. Атроф коронгу бўлгани учун “разведка” мни тонг сахарга колдирдим.
(давоми бор)
Asadbek
12-07-2005, 07:53 AM
давоми:
...
Ха айтгандай йўлда келаётиб окшом пайти, чап (балким ўнгдир) томонда улкан бир чойхонага тўхтаб кечкурунги таомимизни тановул килиб олдик. Икки каватли эди чамамда. Одам гавжум эди. Уйкудан энди уйгонганим учунми, гангиб каерда, номи кандай, каерга карашли макон деган ўй хаёлимга хам келмабди. Эсимда колгани, йўлга караб турган чойхона биносининг чап томонидан оркасига ховлисидаги бир талай эшиклари бўлган чўзилиб кетган бинонинг учинчи ё тўртинчи эшигига кирганимиз.
Eeee, qoyil lekin! Odam xuddi sizlar chiqib olgan mikroavtobusda birga ketayotgandek... :)
Siz aytayotgan choyhona menimcha Pachkamar suvombori yonidagi katta Choyhona bo'lsa kerak, nomi mening ham yodimga kelmay turibdi. 3 yil oldin kamina ham o'sha yo'ldan o'tgandim.
(Давоми)
Ғурбатда ғариб...
Денов постида бизни яна тўхтатишди. Шоферларни хужжатини олиб регистрация қила бошлашди. Ҳаял ўтмай шофер қайтиб келди: “хужжатларимни беришмаяпти, мошинда чет элликлар бор дегандим”- деди. Мен яна паспортларни тўплаб формалилар ёнига бордим. Борган бўйи ялпоқчалаб “Қани ким текширмоқчи”- девордим. Овозим қаттиқ чиқиб кетганиданми ёки каттаконни фуражкасида ўтирган кибр қуши пирр этиб учиб кетганиданми, сакраб туриб кетди. Кўзлари жавдираб паспортларга бирбир назар ташлагач, товушини бегонадан яширган келиндек “Қаерга кетяпсизлар?”- деди. "Деновга, зиёратга” дедим.
Бошқа гапиришга ҳаё қилди шекилли, индамайгина паспортларни қайтариб берди. “Бўлдими?”- десам, бош ирғаб қўяқолди. Кейин автомат ушлаб турган сал тетикроқ бирининг ёнига бориб бормоқчи бўлган зиёрат жойларини отини тополмай чайналиб турсам, ўзлари сайраб кетди: “Шайх Аттор бор, Сўфи Оллоёр яна шайх Зоҳид бор...” яшанг дедим. Хизматда бўлмаганида олиб кетардик йўл раҳбари қилиб. Бироз йўлни таърифлагандай бўлди. Лекин маҳаллий бўлмагандан кейин. Сув бўйи, термиз йўли, тоғ томон, олтинсой деган яна анча кўрсатмаларидан ҳеч нарса тушунмасам да каттакон раҳматлардан айтиб воситага миндим.
Деновга қоронғи тушганда кириб бордик. Биринчи ишимиз албаттаки қоладиган жой ахтариш бўлди. Жой, ётоқ, қўноқ, нима десангиз денг топиш анча қийин кечди. Шаҳарга кирганимизда соат 21 лар чамаси эди. Шаҳар марказига ўхшаш бир чорраҳада Гаи (ҳозир ДАН бўлган буларам) ходимлари кўзимизга иссиқ кўриниб кетди. Шоферимиз деразадан бош чиқариб отел бор-йўқлигини сўради. ДАНчи ”Отелни билайману шу нарёқда ёнма-ён иккита меҳмонхона бор” деб биз келган йўналиш бўйича ўнгга қайриладиган кўчани бошига ишорат қилди. Бордик, йўлнинг чап томонида район сберкассасини эслатадиган бино 3 ёки 4 қаватли (нимага сберкассага ўхшатганига ҳайронман). Денов меҳмонхонаси деб ёзиб қўйилган бинога чопиб кирсам яна чапда бир жомаконли даҳлизда битта хола ўтирибди. Меҳмонхонами ёки ишратчиларни кечалик кира уйими ажратиш қийинди. Алвастиси бор қоронғу коридорли ушбу маскан энг катта ва энг люкс отел экан Деновдаги. "Ҳар қатда биттадан туалети бор"- деб қўйди ҳалиги хола меҳмонхонани юлдузини ошириш учун лекин Қанча ёлворсам ҳам ўрин йўқлигини айтиб шундоқ ён бинога чиқишимизни маслаҳат берди.
Ёнгинада 2 қаватли бино, ўртасидаги аркдан кириларкан. Кирсам П шаклида 1 қаватли бино қуршаб турган катта ҳовлили тўйхона! Биз кирган томони икки қаватли бўлиб чапдан иккинчига олиб чиқадиган темир зинапоя, тепада ҳовлига қараб турган беш олтита эшик. Зинанинг давоми дарвозанинг усти бўйлаб узун йўлак. Яъни ҳалиги эшиклардан (отел номерларидан!) чиққан киши учун зинанинг йўлаги балкон вазифасини ўтайди ҳовлига тепадан қараш учун. Бита йигитчани чақириб ётоқ сўрасам ҳалиги зинадан кўтарилиб 4-5 эшикдан бирини очиб кўрсатди, меҳмонхонада 2та каравотимиз бор, кўпчилик бўлсанглар ерга ҳам солиб бераман- деса бўладими? Бу тўйхонада бўкиб қолиб, уйига етолмайдиган “чорасизларга” аталган ғахўрлик уйига ўхшарди. Бошқа борар жойни йўқлиги Денов Меҳмонхонасидаёқ маълум бўлганди. Кигизда ётишга рози бўлиб тургандик ичимиздан. Жилла қурса, шароитини яхшилаб олайлик деб хожатхона, душ дегандай нарсалар бордир деб сўрадим. Йигитча кулворишдан ўзини зўрға тутиб “душ? Лекин туалет бор ташқарида” деди. Ҳафсаламиз пирр бўлиб ташқарига чиқиб турсак, бир савобталаб келиб сал нарроқда санатория бор, ўшаттан жой топасиз деб қолди.
Бу орада микроавтобусимиз Денов меҳмонхонаси олдида турганидан меҳмонларимиздан бири хожат учун меҳмонхонага кирган экан, Вохохолаб чиқиб қолди. Нима бўлди деб чоповлаб борсак: “Эндигина чўмалгандим битта кап-катта одам келиб юзимга қараб қараб туриб, ёнимда шурр этиб қўйворса бўладими? Нима бало сизларда бу ишга ҳам албатта жамоат билан бошлаш керакми?” дейди. Кулавериб ичак узилди. Лекин қоронғида юзимиз қизарганини ҳеч ким пайқамаган бўлса керак. Меҳмонлар отел деганда ванна, туалети бор номерларни ўйлашарди. Қулоғимга эгилиб: “Тараққиёт хожатхонадан бошланади” дегани ичимни ўртаб юборди.
Ҳалиги кўча билан 1 кмча юргач ўнгга бурилиб 100 млардан кейин чапда яна икки қаватли бино ортига яширинган санатория бизни кутиб турганди. Бу охирги қалъамиз эди. Қандай қилсагам забт этишдан бошқа чорамиз йўқ. Чап чеккасидаги эшигидан кирилса орқа ҳовлисида П шаклида тушган 1 қаватли санаториянинг коридорларига очиладиган каталакдек хоналарни эшикларига сауна, массаж, гўзаллик салони ва рақамлар ёзилганди. Хоналарда 2 тадан крават қўйилган. Бу ерда ҳам атиги 3та ўрин бор экан. Биз эса шоферларимиз билан 7 киши эдик. Пешонам тиришиб одам бошига 5 минг сўм таклиф қилганимдан кейин ходим-ходималар изҳиб кетишди. 2та каттароқ ёшдаги меҳмонларимизни ҳокимият одамларига аталган битта “люкс” (деновчасига) хонага қолган учтасини “гўзаллик салони” деб ёзиб қўйтлган сартарошхонаг жойладик. Шоферларга алоҳида иккита хона кўрсатишди. Ҳар иккаласида ҳам биттадан одам бор экан. Тўйдан қайтганлар бўлса керак, “файзлари” коридорга уфуриб турибди. Шоферлар бу “файз”га чидай олмай автобусни макон тутишди. Гарчи душ дейиш учун етмиш гувоҳ талаб қилсада бита душли туалетлари бор экан қулфини очдириб фаол қилиб қўйдик меҳмонлардан уят бўлмасин деб. Саунасини сўрасак унга алоҳида тўлашимиз кераклиги маълум қилинди. Меҳмонларимизга таклиф қилгандим “уям умумий бўп қолмасин тағин” деган гаплар билан воз кечишди.
Ҳаммасини жойлаб, ҳисоб-китоб, таҳорат-намоз тугатиб келиб ётганимда соат 1 бўлганди. Яна ўйланиб кетдим. Меҳмонлардан уят бўлди. Ётоқларни ичидан соч-поч чиққанини кўришиб ходимдан ”Бит йўқми ёстиқда?”-деб сўраганини айтмайсизми. Ходимни индамай турганини кўриб “Ҳечқиси йўқ. Бит итда, бурга йигитда бўлади”- деб супуриб супуриб ётишди. Яхшиям мўмин кишилар. Сафар, ғурбат тушунчалари мукаммал, кўпни кўришган. Бундан ҳам баттар жойларда ётишга тўғри келгани ҳақида йўл-йўлакай ҳикоя қилиб келишганди, худди Деновни аввал кўргандай…. Эрталаб вақтли чиқиб кетмасак бўлмайди...
Шундай қилиб пешонага битган Денов санаториясининг “люкс” ва “гўзаллик” хоналарида тунашга мажбур бўлдик.
(Давоми бор)
Помир этагида икки кўнгул султони
Эрталаб бомдод намозидан кейин 7 ларда йўлга отландик.Санаториянинг “номер”ларидан бирида бита намозхон отахон бор экан. Пари билмаганни қари билади деб ёнимизга олводик. Отахон ҳам энди бу ёғи азгина пул бўлади да деб рози бўлдилар. Кимга мурожаат қилсак, бир-икки сўм илинжида. Шундай соф, содда, оддий одамлар. Худди ссср пайтида ўрисдан чўчиб қишлоқларда қолиб кетган ўзбекларни ўзгинаси. Ҳали бу ёқларга мустақиллик нари турсин, перестройка ҳам етиб келмаган экан.
Алоуддин Аттор ҳазратларини зиёрат қилишимиз керак эди. Отахон бошларини қашиб туриб “унақаси сал бегонароқ эшитилдия, лекин шу яқинда аловуддин қишлоғи бор. Шўттаги қабристонда бўлиши керак”- деб йўл бошлаб кетдилар. Денов район касалхонасидан тоғ томонга қайрилиб Қизилсув сойи деб ёзиб қўйилган кўприкдан ўтдик. Яна 1 км ча юргандан кейин чапда жойлашган қишлоқ Аловуддин деб номланар экан. Қабристонига бориб қабрлар оралаб кетдик. Излаганимизни тополмадик. Отахон шу ердаги тобут-курак сақланадиган омбор айвончасида намоз ўқишга киришиб кетдилар. “Бомдодни ўқияпсизми, кун чиқиб қўйдику”- дедим. “Йўқ болам, бу ерга келгач икки ракат намоз ўқиб, майитларга бахшида қилиш одат”- дедилар. Кейин китобларимизни варақлаб, биз излаган қабрнинг деновнинг 12 км жанубида чағониён деган жойдалигини ўқиганимизда отахонни кўзлари чақнаб кетди: “Ҳа, энди бу бошқа гап. Чағониён беттан 25 кмча узоқда. Лекин у ерда ҳеч қанақа авлиё йўқ. Йўлда сармозорда шайх Аттор зиёрати бор”- деганларидан кейин бизни кўзимиз ҳам чақнаб кетди. Йўлга тушдик отахон ишора қилган қишлоққа келдик. Намозгоҳ қишлоғи экан. Сармозор қабристони бита тепачада экан. м.автобусимизни қабристон кираверишидаги баҳайбат теракларга омонат қилиб қабрлар оралаб кўтарилиб боравердик. Қаршимиздан кичкинагина, ихчамгина ва яқинда қурилгани билиниб турган мақбара чиқди. Биз ҳурмат-эҳтиром билан бир-бир кириб зиёрат қилиб чиқдик. Ўша жойда қизиқ бир воқеа бўлди. Меҳмонларимиздан бири чиққач, “Бу ердаги қабр бита давлат одамига тегишлига ўхшайди”- деди. Биз ҳайрон бўлиб турганимизда отахон яқинлашиб “Энди шайхни зиёрат қилайлик” деб тепаликни нариги пастроғига ишора қилдилар. Ҳаммамиз беихтиёр ҳалиги меҳмонга ялт этиб қарадик. Мўминнинг фаросатидан қўрқинг ҳадиси ақлимга яшиндай келиб кетди.
Сал нарроқда бизни яна аввалги биродар қабрлардагидай мутавози, тепаси очиқ қабр кутиб турарди. Нақшбандия улуғларининг қабрлари бирбирга жуда ўхшашлигидан бу қабрни ҳам ташқи кўринишиданоқ билишга бўларди. Фарқлари катта-кичиклигида эди, холос. 25 ёшлардаги мутабассим йигит пешвоз чиқиб кўришгач, “бу ёғига ялянг оёқ ўтсак. Одоби шундай ”- деб қолди. Аввал бунақасини эшитмаган эканман. Иккиландим, меҳмонлар бўлса, “буюкларни йўлига айнан мос келади” деб туфлиларини еча бошлашди. Ерга терилган тошлар ялангоёқ зиёратчиларнинг кўплигидан силлиқланиб кетган. Ёғ томса ялагудек. Ҳаво илиқ бўлишига қарамай куз ҳавоси эмасми, устига устак тонг саҳар, тошларни муздайлигидан битта пайпоқ жониворнинг борлигиям сезилмайди. 10 м илгаридан ялангоёқ бориладиган йўлакнинг уч-тўрт қадамидаёқ касал бўп қолмаймизми мабодо деган андиша билан тараддудланиб қолдим. Лекин 60-65 ёшли меҳмонларимизни ҳеч иккиланмай илгарилашларидан жасорат олим.
Аллоҳу таоло бутун оламга ризқ, рушд, ҳидоят, файз, барака, ҳаёт, умр яна биз билмайдиган саноқсиз неъмтларини осмондан ёғдиради. Булардан рушд ва файз пайғамбаримизни қалбларидан бутун оламга ёйилар экан. худди радио тўлқинларидек чор атрофга тараб турган бу нурларни ул зотнинг ворислари бўлмиш юксак олимларнинг қалбларигина қабул қилиб атрофидаги мўминларга акс этирар экан. Мўмин мўминнинг оинаси ахир. Шунинг учун солиҳ, тақводор зотлар ёнида, қабрида, даврасида қилинган дуоларнинг ижобат бўлиш эҳтимоли баланд. У ҳам бўлса дуогўйнинг ихлоси ва самимиятига боғлиқ.
Аллоҳу таоло шундай ижобат маконларида ҳам бизларни имтиҳон қилади. Мана мен бунинг яққол мисоли. Шунча ўқи, тила, бағишла, агар қалб оёқ тагидаги тошларни неччи градус эканлигини ўлчаш билан овора бўлса, дуонгиз дўппингизни тепасига ҳам кўтарилмаса керак.
Шуларни ўйлаб, ўзимни қийнаб хотирамни аранг жамлаганим шунчалик оёқ эсдан чиқиб кетди. 20 минут жуда ҳузурбахш зиёрат бўлди.
Мусулмонларнинг қалблари туташ идишларга ўхшайди. Бирида бўлган камолот бўшроғига оқади. Қабр зиёратларида маййит билан зойирдан қай бири қалбан устунроқ ва етукроқ бўлса, иккинчисини таъсирлаб фоида беради. Шунинг учун шаъидлар, валийлар ва уламо қабрларини зиёрат суннат бўлибди. Исломиятнинг аввалида бунга чек қўйилишига сабаб, мусулмонлардан вафот этганлар ва мусулмон қабристонининг бўлмаганлигидан экан. шундай қилиб, рухий чанқоғиизни бир миқдор қондиргандай бўлдик.
Бу жойлар аввал Чағониён қалъаси бўлган экан Самарқандга боғлиқю ҳозир чағониён маркази яна 10 кмларча олисроқда экан. Мана шу тепаликдан чор атроф кафтдай кўринарди. Эндиги борадиган манзилимиз Қози Муҳаммад Зоҳид ҳз.лари қаршимизда кўриниб турган тоғ этагида экан. Тахминан 50 км масофада.
Зиёратга ҳотима ясаб Денов-Самарқанд йўлига тушдик. Кечаси ўтган йўлимизда Деновга кираверишдаги қишлоқни номи Олтин сой экан. ўша жойда ўнг томонни кўрсатиб турган Вахшивор деб ёзилган лавҳадан ўнгга қайрилдик. Тепаликка қараб тирмашиб бораётган эдик. Отахон вахшивор ҳақида қизиқ бир ҳикоя гапириб бердилар. Бир замонлар илонлар тўдаси кўчиб мана шу тепаликка тўпланишган экан. одамлар жон дардида қоча қоч бошланиб кетганидан кейин оқсоқоллар чорасини қидиришга тушишганмиш. Кейин Сўфи оллоҳёрни дуолари билан илонлар бошқа жойга кўчибди. Шундан бу ерларни оти Вахшивор бўлиб қолган экан.
3-4 км дан кейин Сайрам қишлоғидан ўтдик. Шу тарихий қишлоқ номлари мени жуда ҳаяжонлантиради, айниқса советлар давридан олдинги исмини сақлаб қолган бўлса. Масалан Чимкентни яқинида ҳам Сайрам деган жой бор. Авваллари исфижоб номли улкан қалъа бўлган экан. Ҳозир туман маркази, поселка типидаги қишлоқ. Кўриниш ва маънавий ҳавоси эътибори ила Чироқчи ё Шаҳрисабзга ўхшаб кетади.
Кейин Хўжасоат, сал баландроқда Кичик Вахшивор қишлоқларидан ўтдик. Баландга кўтарилган сайин тақир қоялар, афғонистонни эслатувчи манзараларга ўчакишгандек йўл чеккасида кенг узумзорлар аро йўл тепдик. Чапда битта заводсимон иморатга яқинлашганимизда узумзорларнинг “ҳикмати” аён бўлди. Вино заводи экан афсус. Шундай пок, оддий одамлар ҳам вино заводга узум ташиб ризқ ахтаришар экан. Йўлда мактабдан ҳозиргина чиқиб уйга равона бўлган болалардай узундан узун ёш-қарилар пиёда эшелони. Ҳар икки қадамда бир ортга қарашади. Мошин-пошин дардида эканликлари аниқ. Чунки Вахшиворга кўтарилиб борганимизда микроавтобусимизни суви қайнаб кетганди. Демак тикроқ тепаликка чиққанмиз. Пиёда юриш қанчалик азоб бўлади бунақада.
Вахшивор. Жуда эски, яъни тарихий аҳоли пункти эканлиги уй ва кўчаларнинг жойлашиш тарзидан билиниб турарди. Кенг Аллоҳнинг тоғида жин кўчаларга бало борми бўлмаса? Баландроқ битта жойда зиёрат маҳалини топдик ниҳоят. Бе ерда ҳам ҳар галдагидай болаларга қўшилиб катталар ҳам атрофимизни ўраб олиб бизни томоша қилишарди. Янабир оломон микроавтобусни атрофини “қуршаган”. (чет эл маркали эди ).
Йўл чеккасидан тепаликка қараб қия чиқиладиган томонда катта дарвоза, тепасига Ўзб. Мусулмонлар диний бошқармасига қарашли зиёрат ўрни.. деб бошланган ёзувли лавҳа. Табаррук қадамжоларнинг деярли барчасининг диний бошқарма қарамоғида бўлиши қувонарли ҳолат. Бўлмаса булар ҳам музейлар бошқармасига ўтиб кетиб, кириш-чиқиш билетли бўлиб қоларди. Гарчи бошқа шаҳарлардаги бир-иккитаси аллақачон музейчилар қўлига ўтиб улгурибди. Дарвозадан кирилгач бир иккита пастқам иморатлардан бири масжид экан. иккинчиси тепалик ёнбағри бўлганидан сал баландроқ жойлашганди. Айланиб ўтдик. Қабр катта тошлар билан дўнг қилиб қўйилган. Атрофи ўралмаган ва бир тепачани этагига қия жойлашган эди. Агар бош томонида улуғларга хос тариқат туғи бўлмаганида таниш мумкин эмасди.
Қози Муҳаммад Зоҳид “қаддасаллоҳу сирруҳ” хз.ларини зиёрат қилиб, суралар тиловат қилдик. Кейин ташқарига чиқиб вахшиворлик қўшниларига совға-саломлар улашдик. Атрофдаги яқин уйлар соҳибларини чақиртириб, ҳадялар билан мамнун қилиб дуоларини сўраб изимизга қайтдик.
1 соатда тугатишни режалаштирган бу икки зиёратимиз роппа-роса 5 соатга чўзилганди. Вақтимиз зиқ бўлганидан яна 15 кмча юқорироқда бўлган Сўфи Оллоҳёр бобомизни масофадан дуолар қилиб йўлга тушдик. Ҳали отахонни орқага Деновга элтиб қўйишимиз керак. Шоферлардан бири тожкча акценти билан “Ўтоо! Таксига тутиб бероймэ?” – деб кўрувди. “болам лабиз деган нарса бор”- деб отахон иштахасига нуқта қўйди. Шоферларимиз нолишни бошлашган эди. Хуллас соат 1ларга яқинлашганда отахонни омонат олган жойимизга элтиб, совға-саломлар билан “кўмиб” дуоларини олиб самарқанд қайдасан деб йўлга тушдик.
forumda mashhur bo'p ketganidan yon daftarimcham tanishlarim orasida qo'ldan qo'lga o'tib ketdi. ma'zur tutgaysiz. amonat qaytib kelgach davom ettiramiz endi. barchangizni qurbon hayiti bilan tabriklayman. Allohu taolo oxiratimizni ham bayram qilsin jumlamizni. omin
R.Azimov
01-07-2006, 05:56 AM
forumda mashhur bo'p ketganidan yon daftarimcham tanishlarim orasida qo'ldan qo'lga o'tib ketdi. ma'zur tutgaysiz. amonat qaytib kelgach davom ettiramiz endi. barchangizni qurbon hayiti bilan tabriklayman. Allohu taolo oxiratimizni ham bayram qilsin jumlamizni. omin
Qoyilman.
Men ham o'zimcha O'zbekistonga qilgan sayohatimni qog'ozga tushirgandim. Sizning hikoyangiz oldida bir chaqalik bo'lib qolarkan.
Ofarin!
R.A.
hangug
01-07-2006, 06:01 AM
forumda mashhur bo'p ketganidan yon daftarimcham tanishlarim orasida qo'ldan qo'lga o'tib ketdi. ma'zur tutgaysiz. amonat qaytib kelgach davom ettiramiz endi. barchangizni qurbon hayiti bilan tabriklayman. Allohu taolo oxiratimizni ham bayram qilsin jumlamizni. omin
Ziyoratgoh joylar haqida qayerdan malumot olgansiz, kelishdan oldin?
o'zbekiston ziyoratgohlarga juda boy. meni qiziqtirgan narsa Naqshbandiya silsilasi edi. turkcha enciklopediyalardan malumot to'plagandim. lekin ular ham bu olimlar va avliyolar qomusi haqida besh-oltita ko'ylak to'zdirishgan ekan. qani endi o'zbekcha tarjimalari javonimizni va qalblarimizni bezatib tursa
R.Azimov:
Qoyilman.
Men ham o'zimcha O'zbekistonga qilgan sayohatimni qog'ozga tushirgandim. Sizning hikoyangiz oldida bir chaqalik bo'lib qolarkan.
Ofarin!
R.A.
iltifotingiz uchun rahmat siz qashqadaryo yo surhondaryoliksiz yanglishmasam. kuzatishlaringizni o'sha joylik zotni og'izlaridan tinglash ham qanchalik mo'tabar ekanligini bilarsiz. mana shu qiymatli hikoyangizni ayamang endi bizlardan
Ulug'bek
02-05-2006, 01:47 PM
forumda mashhur bo'p ketganidan yon daftarimcham tanishlarim orasida qo'ldan qo'lga o'tib ketdi. ma'zur tutgaysiz. amonat qaytib kelgach davom ettiramiz endi. barchangizni qurbon hayiti bilan tabriklayman. Allohu taolo oxiratimizni ham bayram qilsin jumlamizni. omin
Han,
Amonat qaytib kelgandir endi:) , yoki safarnomaning Samarqand - Buxoro yo'nalishiga oid qismi amonat qo'lida bo'lganlar tomonidan havoga uzatilib yuborildimi-a :) ?
Qayta ishlangan shaklida bo'lsa ham istemol qilishga mushtoqmiz.
Unique
02-05-2006, 02:08 PM
Bir hafta davom etgan O'zbekiston bo'ylab sayohatimiz ham qiziqarli, ham achinarli ham da sarguzashtlarga boy bo'ldi
Yozuvchilik san'atizga qoyil qolsa bo'ladi. Sayohatizni o'qib huddi O'tkir Hoshimov yoki Pirimqul Qodirov asarlari ko'z oldimga keldi. Endi bitta maslahat: shu sizam hamma sayohatlariz-u, qiziqarli voqealarni yig'ib asar yozsez zo'r chiqardi???
Han,
Amonat qaytib kelgandir endi:) , yoki safarnomaning Samarqand - Buxoro yo'nalishiga oid qismi amonat qo'lida bo'lganlar tomonidan havoga uzatilib yuborildimi-a :) ?
Qayta ishlangan shaklida bo'lsa ham istemol qilishga mushtoqmiz.
asslaomu alaykum Ulug'bek. ha sizam yo'q bop ketdingiz, hajjga otlanib ketdimi deb o'yladim, hak mavsumi edi da:)
shu desangiz omonat bu omonat ekan. berishga berib so'rab olomaysiz. bir iiki kunda kelib qolishi kerak oxirgi habarlarga ko'ra..
Qayta ishlangani baribir yaxshi chiqmaydi da. birinchi marta yuzma yuz kelgan holatdagi kechinmalar baribir boshqacha lazzatli bo'larkan.
Xudo xohlasa, hayirli ishni tamomlashga oz'imam juda talpinib turibman.
[quote=MehmonGirl]
Yozuvchilik san'atizga qoyil qolsa bo'ladi. Sayohatizni o'qib huddi O'tkir Hoshimov yoki Pirimqul Qodirov asarlari ko'z oldimga keldi. Endi bitta maslahat: shu sizam hamma sayohatlariz-u, qiziqarli voqealarni yig'ib asar yozsez zo'r chiqardi???
astag'firulloh, :shock: Mehmon qiz. Ja unchalik emas, lekin iltifotingiz uchun rahmat. yuqorida aytganimdek dastlabki kechinmalar ta'sirli bo'ladi. Asar yozishga kelsak,, hmmm nima degandi Navoiy bobomiz:
mushkuldir bu maydon ichra turmoq
nizomiy panjasiga panja urmoq.. (yodimda qolgani bo'yicha yozdim:) )
yana bir bor rahmat sabr va iltifotlaringiz uchun. ...
Ростини айтсам мен таниган Н"нинг курган вокиа ва ходисаларини усталик билан хатка туширадиган махоратидан хабарим йук эди. Форум иштирокчилари айтган гапларга кушилмасга сабабим йук. Офарин. Туркистон хакида хам бир мумкинчилиги булса айтилип утса нур устига аъло нур. Бу гапимдан Узбекистон шахар ва кишлокларини камситиш улар бундай тасфирлашга арзимайди демокчи емасман албатта. Хуббул Ватан минал Иман. Бирок узимиз тугилип усган Туркистон хакида бошкалар фикрини урганмокдир. Унинг, яъни Туркистоннинг тарихи, халки, урф-одатлари, сабаб ва натижаларини биргаликта маъруза килсак. :?
kuni kecha yana o'zbekiston sayohatidan qaytdik. bu galgisi oldingisidan ham taassurotga boyroq bo'ldi...
avvalgisini yozib oxirlatmagandik afsus, bu galgisini yozishga vaqt kamlik qilyapti... baribir yozib sizlar bilan baham ko'rishga azm qilaman. chunki ikki sayohat orasida O'zbekistondagi o'zgarishlar nuqtayi nazaridan ro'y bergan katta farq meni qattiq quvontirdi... mana shu quvonchimni bo'lishmasam bo'lmaydi... :) Sizni ham quvontirgim keladi...
Xursandlik, hurramlik baham ko'rilgan sayin ko'payishiga, ziyoda bo'lishiga qattiq ishonaman...
kuni kecha yana o'zbekiston sayohatidan qaytdik. bu galgisi oldingisidan ham taassurotga boyroq bo'ldi...
avvalgisini yozib oxirlatmagandik afsus, bu galgisini yozishga vaqt kamlik qilyapti... baribir yozib sizlar bilan baham ko'rishga azm qilaman. chunki ikki sayohat orasida O'zbekistondagi o'zgarishlar nuqtayi nazaridan ro'y bergan katta farq meni qattiq quvontirdi... mana shu quvonchimni bo'lishmasam bo'lmaydi... :) Sizni ham quvontirgim keladi...
Xursandlik, hurramlik baham ko'rilgan sayin ko'payishiga, ziyoda bo'lishiga qattiq ishonaman...
To'g'ri qarorga kelibsiz. Bir sarguzashtlaringizni yozing, yo'qsa odam bu forumda nuqul IAK ga oid bo'lgan maqolalarni o'qib, uzoq fikrga cho'kkanidan charchab ketdi.
Amiri Turkiston
05-18-2007, 10:32 AM
bir telefon qilganizda - mehmonimiz bulardiz taqsir ...
ham mayli ...safar behatar o'tibdiku muhimi :-)
Uzr, UZdan forumga kira olmagach PM ni o'qiy olmadim... Uni ustiga ko'pchilik edik, sizga zahmat bo'lmasin dedik-da :)
yaqinda otrabotka qilamiz xudo xohlasa, samimiy taklifingiz uchun tashakkur, do'stim...
chudesnaya
05-19-2007, 05:47 AM
Rahmat ajoyib hikoyangiz uchun, O`zbekistonning cho`l viloyatlarini ko`rganday bo`ldim. Surhondaryoning Termiz Ota ziyarotgoh joyida bo`lmabsizlarda, attang! Davomini kutib qolaman!!!
O'zbekiston Sayohati - 2007
-- I --
Тайёргарлик...
Қаҳратон қиш кунларидан бирида бетонистон бўп кетган Олма Отанинг шалаббо кўчаларию шовқин иш марказларидан зада бўлган 3-4та дўст бир пиёла иссиқ чой устида бош қўшганмиз. Ҳамманинг юзида қандайдир хорғинлик сезилади. Биламан бу йигитларнинг ҳар бири ўз ишини севиб бажаради. Асло маслакларидан норизо ёхуд хуноб эмаслар. Лекин юзлардаги бу хорғинлик, аҳён аҳёнда ўзлари ҳам маълум қилганидек, тиқилинч шаҳар ҳаётидан. Бошқа жиддий сабаб бўлиши мумкин эмасдай назаримда.
Чунки ўз танамда ҳам шундай бир беҳузурлик сезаман гоҳида...
Хуллас мана шундай холати руҳия ҳоким бўлган даврада суҳбат мавзуси табиий оқимига бўйсуниб саёҳат ва истироҳат томон йўналди.
Ҳар хил маршрутлар, маскан ва мамлакатлар, бирбиридан жозиб таклифу тавсияларнинг устма уст ўртага ташланиши даврани ҳам жонлантирганди. Юзларда тундлик йўқолган, худди эртага озодликка чиқадиган зиндон аҳлидек “борсак анақиб дам оламиз, мамнақиб кезамиз” деган ҳикоялар бошланиб, бир-бирига уланиб, ажабтовур қийқириқлар нақоратида ниҳоий манзил йўли аниқ бўп қолди. “Ўҳўў, иштаҳалар карнай-ку” дейдиган жиннини ўзи йўқ эдида ўшанда. Режалар хўроз эди-ю фақат ҳар дойимгидек битта дўстимизнинг “завжалар-чи?” сўзи “иштаҳанинг белига тепиб” аллақачон Ҳиндистонга отланиб кетган ҳаёлларимизни қулоқларидан судраб, қайтариб келди.
Шундай қилиб, режалар билан бирга борар жойни ҳам таги олиб, ҳаммаси бошқатдан бошланди. Завжалар омон бўлисшин илоё. Ҳисобга жуфтлар қўшилгач, харажат ҳисоб китоби ҳам қўл ушлашиб, жуфт-жуфт бўлиб чиқиб келаверди. Пешаналар тиришганини юзга қарамасдан билса ҳам бўладиган ва ҳарбир оила раиси ҳаётида ҳар қадамда рўй бериши одатий тус олган “нозик дам”ни яна бир бор жамоат бўлиб яшаб одик. Борадиганлар сони икки рақамига кўпайтирилган, кўпайтмани харажати эса тақрибан тўрт рақамига кўпайтирилиш арафасида турганда, жамоатдан бир хайрсевар янги таклиф ташлаб савобга қолди. “Жамоатда раҳмат бор” деб бежиз айтишмас экан. Етти иқлимга ҳезланган кўнгул киссага, жуссага, трасса ва массага ёв бўлмаган энг муносиб ўлка сифатида Ўзбекистонни ихтиёр қилгач, режалар мана шу гузаргоҳ устига қурилди.
Манзилнинг нисбатан яқин “чет эл”дан танланиши ва сафарнинг завжот ҳамроҳлигида амалга ошадиган бўлиши, яна маҳрамларни роҳатлари ғамида шахсий транспортларда бориш ғоясининг туғилишида кам ҳисса қўшмади. Хуллас ҳалиги кўпайтма учта уловга жойланадиган бўлди.
Бутун бу ҳангома сафардан бир ойча аввал жараён этмоқда. Бир ой бўйи иккинчи марта бу масала ҳақида жиддий “ўтириш” қилинмади. Фақат битта дўстимиз жонини Жабборга бериб гуглми алламбало сайтларни титиб, нақ 20 дона харита ясади. Эринмаган банда-ей, яна қайси жойда қандай зиёратгоҳ, меҳмонхона, тарихий жой бор ҳаммасини жамлаб, уч машинага биттадан нусха тахт қилиб қўйибди.
Биз темир-терсак, ғилидрак ишлари билан бирга Ўзбекистоннинг бензин “конларини” суриштириш билан вақт ўтказдик. Хонимлар эса, бир ой бўйи ўзларини ҳар дойимги табиий ишлари бўлмиш, керакли-кераксиз ашқол-дашқолни тўплаб, юкларни бир чама бўлса ҳам оғирлаштириб, саёҳатни бошидан “вазмин ва виқорли” ҳолатга келтириш вазифасини қоилмақом ижро этишди. Уларни тайёргарлигини кўрсангиз ўн олти минг оламда биздан бошқа сайёҳ йўқ деб ўйлашингиз турган гап...
davomi: "To'sma Yo'limni chegara"
Ma'ruf
05-30-2007, 10:04 PM
Ha yana bo'sin.
Dovomini kutyapmiz...:)
vBulletin® v3.7.0, Copyright ©2000-2008, Jelsoft Enterprises Ltd.