TUSH

[ATOMIC]

(Oq she'r)

Men
Tush ko’ribman
Tong
Otayotganmish,
Nafis, mayin tiniqlik
Borliqni ohista
Uyg’otayotganmish.

Bitishik turarmish yer bilan osmon
Jildirab oqarmish ipakdek nurlar,
Men esa
Raqs tusharmishman,
Atrofimda go’zal hurilar.

Ko’kda dengiz shovullar emish,
Zamin uzra yulduzlar to’zg’ib
Tovlanarmish zumrad singari,
Mayin titrar emish yuragim
Har tekkanda mo’jaz saharning
Serin lablari.

Lekin nedandir, ne sababdandir
Ko’nglim emish yarim,
Rangim za’faron
Nenidir izlar emish
Ko’zlarim.

Sohta tuyularmish butun manzara
Va kimdir yashirin
Meni qilar emish
Masxara.

Hiringlarmish qandaydir bir sir
Ko’zlarimning ichiga boqib.
Men sekin payqabman
Bu ko’rganlarim-
Muzlatib qo’yilgan
Qalbaki tasvir…

Men sekin farqlabman
Bu tongning
Chiqajak
Quyoshi
Yo’qligin…

Tush ko’ribman…

Men tushlarimda
Quyoshni
Ahtarib
Yuribman…

[kanzler]

manimcha ham, tushda oy axtarilmasa kerak a :-))))))))

Zur chiqibdi she'r, manga yoqdi :-)