Muhammad Solih

From Uzbekistan Online Forum WikiMedia

Contents 1 Agar sevsak 2 Bir odam sevsa bas 3 Biz nega uchrashdik? 4 Erkak 5 "Goh yurak oyoqqa" 6 Hali 7 Hayot 8 Ilk bor 9 Ixtiyor 10 Ko’ksimdagi bosh 11 Maqtov 12 Men sendan xat emas, xavotir oldim 13 Men seni izladim 14 Menga bir qara 15 Nima haqda sening jimliging? 16 Ochildi bir gulim 17 Qayrilib qarama 18 Sen ketgandan so’ng 19 "Sening go'zalliging" 20 Sevgidan qo’rqmadik 21 Shunchalar baxtli bo’ladimi?.. 22 Telefon 23 Tog'da 24 Ularga ayt, sevgilim 25 Xayrlashuv 26 Xayrlashuv 27 Yigitlar

[edit] Agar sevsak

Bizga falak yordam bermaydi

Yordam bermas bizga bu Yer ham.

Bizga falak yordam beradi,

Yer ham yordam berajak albat-

Agar bir-birimizni sevsak

[edit] Bir odam sevsa bas

Bir odam kimnidir sevarkan toki,

Bir odam sevsa bas, bitta odamzod-

Butun bashariyat yashashga haqli,

O’zini oqlaydi yerdagi hayot.

[edit] Biz nega uchrashdik?

Men bunga kelganman seni kutmoqqa

Sekund, minutlarni o’ldirmoq uchun.

Kun bo’yi ming xayol surib sen haqda,

Kelganman bir soat o’ltirmoq uchun.

Kelganman, sevgidan yongan ko’zlaring

Ko’rib, ko’rmaslikka yo’ymoqlik uchun.

Va topib qo’yilgan go’zal so’zlarni

Esimdan chiqarib qo’ymoqlik uchun.

Sen esa qo’limdan gullarni olib

Shoshib hidlamoqqa kelgansan faqat,

Kelgansan hammasi chekkada qolib,

So’rashga soatu ketmoqqa ruxsat.

[edit] Erkak

Erkak maktub yozsa,

Ayol qo’llari

Titraydi ming farsah narida.

Qo’ng’iroq qilsa u,

Ayol ovozi

Erkak ovozining pinjiga kirar.

Erkak uyga kirar, nihoyat,

Ayol qo’llari

Aylanar daf’atan ikkita gulga…

Erkak uyda bo’lsa,

Chiroqni bemalol uchirish mumkin.

[edit] "Goh yurak oyoqqa"

Goh yurak oyoqqa buyurar,

Lozimdir oldinga yurmaging!

Oyog’im oldinga yursa goh,

Ortga tortib ketar yuragim!

[edit] Hali

Hali anchagacha

Ko’nikmay yuraman bu yangi yilga.

Qogozlarga adashib.

Eski yil bilan men imzo chekaman.

Hali uzoq vaqtgacha

O’zga ayollarni

Sening isming bilan chaqirajakman.

[edit] Hayot

Hayot go’zal.

Hayot shu qadar go’zaldirki, hatto sen uchun ham o’limga rozi bo’lmas edim, sevgilim.

Hayot beqiyos go’zal.

Shu qadar go’zalki, o’lim borligini bilgan kuningdan tortib, to o’lguncha bu hayotni yo’qotish haqida yig’lasang arziydi.

Hayot shunchalik go’zal.

[edit] Ilk bor

Daraxtlar kutgansimon bahorni,

Yigitcha ilk bora kutardi yorni.

Mana, keldi uning ko’ngil chirog’i’

Lolamisol yonib ikki yonog’i.

Yigit o’pmoqchiydi… chekindi-ku qiz

Va dedi ohista: “Biz hali yoshmiz…”

O’sha kech yigitcha qaytib telbavor

Labiga ustara tekkizdi ilk bor.

[edit] Ixtiyor

Kuzatarkan, namlidir ko’zing,

Mening uchun nega g’am yeysan?

Qarashimni o’g’irlab o’zing,

Yana menga “qaramang” deysan.

Seni deya qolsam yo’limdan,

Maylimi, deb so’rayman asta,

Ixtiyorim olib qo’limdan,

Deysan yana “ixtiyor sizda”…

[edit] Ko’ksimdagi bosh

Men seni, yuragim, silagim kelar,

Esiz, qolib ketar menda bu haqing…

Ko’ksimga sen kabi birorta dilbar

Boshini qo’ymagan shunchalar yaqin!…

[edit] Maqtov

Men sizni doimo maqtagim kelar,

Koklarga ko’targim keladi doim.

Afsuski, men sevgan odamim bilan

Suhbatga no’noqman – shudir xatoim.

Siz menga azizsiz. Maqtamayman, yo’q.

Men ko’kka ko’targan insonlar mingta.

Sizga nima darkor odam to’la ko’k,

Keling, o’ltiraylik ovloq zaminda…

[edit] Men sendan xat emas, xavotir oldim

Men sendan xat emas, xavotir oldim

Bu cheksiz oqshomning bir chekkasida.

Men seni juda oz quvontiroldim,

Men senga juda ko’p bitdim qasida.

Kim qo’yib berar bu tuyg’u ismini,

Kim o’ylab topadi yangi ibora-

Bora-bora tordir dunyo mazmuni,

Faqat shu ko’zlaring kengdir tobora.

[edit] Men seni izladim

Men seni o’tgandan so’radim,

Kelgandan, ketgandan so’radim.

Men senga intildim, men senga chopdim,

Men seni izladim, nihoyat topdim.

Bizlarga o’tganlar qaradi,

Kelganlar, ketganlar qaradi.

Men esa yoningdan indamay o’tdim,

Bir so’z ham, bir so’z ham aytolmay ketdim.

[edit] Menga bir qara

O’lim, menga bir qara-

Men juda ham uzoq yasharman.

Ichimda bir hayot barq urar-

Men uni sendan ham yashirmam.

Bir sevgi barq urar, yarqirar.

Qamashardi ko’zing bo’lganda,

Shunday bir sevgikim, baqirib

Yig’larding, men hozir o’lganda!

[edit] Nima haqda sening jimliging?

Xona go’yo sovuq bir bag’ir-

Bizning boshlarimiz qo’yilgan.

“Axir”… “Axir”…”Axir”…

Idrokka uch bora o’yilgan.

Yuzimni sen tomon burgani

Qo’rqaman, yetmaydi jur’atim-

O’zingday qoraga burkanib

Ko’zingda bir sharpa yuradi.

Gapir. Hech bo’lmasa ingra,

Nima ko’zlaringda meni imlagan?

Nima haqda bu siniq chehra,

Nima haqda sening jimliging?

[edit] Ochildi bir gulim

Men hali yosh edim…

Mening o’n gulimdan birortasi ham

Ochilmagan ekan-ku hali!

Nima, Sen Gulim emasmiding yoki

Yo’q.

Ochildi mening bir gulim.

So’ldi ham.

[edit] Qayrilib qarama

Qayrilib qarama. Qayrilib qarab,

Unga qo’l silkmagin. Silkkandan keyin

Turgin sukunatda sen talmovsirab,

Qaytmagil, qaytmaslik bo’lsa ham qiyin.

Qaytdingmi izingga, qaytdingmi, endi

Aytmagil loaqal so’nggi so’zingni!

Bari bir aytdingmi, aytdingmi, endi

Tiz cho’kkil, bag’ishla unga o’zingni!

[edit] Sen ketgandan so’ng

Bir kun o’tar sen ketgandan so’ng-

Tanholikning birinchi kuni.

Lekin ikkinchi kun

Imillay boshlaydi kutilmaganda.

Uchinchi kun zo’rg’a,

Oqsoqlanib kelar oynam oldiga.

To’rtinchisi o’tmas-

Oyoqlari yo’qdir to’rtinchi kunning.

[edit] "Sening go'zalliging"

Sening go’zalliging boshlangan joyda,

She’riy iqtidorim bo’ladi tamom.

Satrlar uyalar sen bo’lsng paydo,

Satrlar keladi sen ketgan hamon.

[edit] Sevgidan qo’rqmadik

Sevgidan qo’rqmadik, Muqaddas sevgidan,

Dadil va mardona oldiga bordik.

Keskin harakat-la hislarga to’la

Yuraklarni to’kib yubordik!..

[edit] Shunchalar baxtli bo’ladimi?..

Agar shu ko’ksimga,

Sen bosh urib turgan ko’ksimga,

xanjar bilan ursalar edi

balki men yig’lamas edim hech.

Lekin hozir yig’lagim keladi

ko’ksimga egilgan boshingni ko’rib,

yig’lagim keladi-

sen meni;

men seni,

bahor esa ikkimizni quchib turganda…

-Eh, shunchalar ham baxtli bo’ladimi kishi?!

[edit] Telefon

Telefon jiringlar-

Olasan

Nafaslar uchrashar.

Ovozlar…

Keyin beso’naqay telefon

Do’sting chehrasiga aylanar.

[edit] Tog'da

Ko'kda yolg'iz qolgan to'lin oy

Boshing uzra to'kadi titroq...

Oqib borar tog'dan tushgan soy

Sukunatning o'rtasidan qoq

Oydinlikning muzdek sutida

Sen o'zingni qo'yding yo'qotib...

Bu baxt ozday, buning ustiga

Kimdir seni sevadi qattiq...

[edit] Ularga ayt, sevgilim

Sen va men bilamiz

muhabbatning

timsoli majnuntol emasligini

Sariq gul – ayriliq,

qizil gul, uchrashuv, degani emas.

Ayt ularga,

tushuntir, sevgilim

biz qanday sevgandik bir-birimizni,

qanday sevgan edik, gullari uzilgan olamda.

[edit] Xayrlashuv

Fidoiy sochlaring ko’ksimga yana

Jarga tashlaganday o’zin tashlarlar…

O, sen yana, ko’zingga yana

Parda tortmoqdasan yoshlardan!

Aytdim-ku, quchishib o’tirolmaymiz.

Sen ila bir umr- qo’llarga og’ir.

Bir umr tikilib bir-birovga biz

O’tirolmaymiz – ko’zginang og’rir.

Qo’y endi, bu achchiq ko’z yoshlar bilan

Sho’r qilib yuborma taqdirimizni.

[edit] Xayrlashuv

Tishlarim tishimga tegmadi, tegmadi-

Titraymen.

Barmog’im aylanar oxirgi tugmada-

Turay, men.

Tilimga sanchiqday sanchildi so’nggi harf-

Yuray, men.

Kiyim yo’q. Bo’ynimda faqat shu qora sharf-

O’ray men.

Tugadi. Vaqt yo’q sen bilan unumsiz

Kuymoqqa.

Alvido. Kiyim yo’q tinimsiz, tinimsiz

Kiymoqqa.

[edit] Yigitlar

Ha, bizlar shundaymiz, shunday azaldan,

Don Kixot qalbiday bor pokligimiz,

Bizda xayol ko’pdir xotiralardan,

G’amlardan ko’proq quvnoqligimiz.

Suronli hayotga allaqachonlar

Bizlarni kuzatdi ona bo’sag’a.

Tashnamiz (yurak va labda o’t yonar!)

Do’stlarga, kitobga, ba’zan bo’saga…

Ha, bizlar shundaymiz, yashirmoq nega,

Hayotda sevamiz G’olib otini.

Bilamiz bir paytlar yashirib bizdan

Otalar simirgan mayning totini.

Qizlar nomimizga maktublar bitar,

Do’stlar qilishadi uzoqda xotir.

Munis ona esa bizdan xat kutar,

Otalar jimgina olar xavotir…